Cambodia
 |
លោក ប៊ូ ច័ន្ទភីរូ អគ្គនាយកនិយតករធានារ៉ាប់រងកម្ពុជា (IRC) នៅទីក្រុងភ្នំពេញ។ KT/Heng Chivoan |
លោក ប៊ូ ច័ន្ទភីរូ អគ្គនាយកនិយតករធានារ៉ាប់រងកម្ពុជា (IRC) ក្នុងកិច្ចសន្ទនាជាមួយកាសែតខ្មែរថាមស៍ ដោយលោកនឹងជម្រាបពីរបៀបដែលឧស្សាហកម្មនេះកំពុងរៀបចំឆ្ពោះទៅរកការធានាដល់ប្រជាជនកម្ពុជាចំនួន ១៧ លាននាក់ ដែលស្ថិតក្រោមឆ័ត្រសុវត្ថិភាពនៃការធានារ៉ាប់រងក្នុងឱកាសទិវាធានារ៉ាប់រងឆ្នាំ២០២៤ នៅខេត្តព្រះសីហនុ។
សំណួរ៖ តើលោកអាចប្រាប់យើងអំពីទស្សនវិស័យរបស់លោកសម្រាប់ឧស្សាហកម្មធានារ៉ាប់រងនៅកម្ពុជាបានទេ?
ឧស្សាហកម្មធានារ៉ាប់រងបានកើនឡើង២៥ ភាគរយក្នុងរយៈពេល១០ ឆ្នាំចុងក្រោយនេះ។ ក្នុងរយៈពេល៥ឆ្នាំចុងក្រោយ ដោយសារទីផ្សារធានារ៉ាប់រងត្រូវបានពង្រីក និងមានស្ថានភាពរឹងមាំជាងមុន អត្រាកំណើនមានប្រហែល៧ ភាគរយ។ ឆ្នាំ២០២៣ គឺជាឆ្នាំដ៏លំបាកសម្រាប់ទាំងធនាគារ និងការធានារ៉ាប់រង។ ប៉ុន្តែយើងកំពុងឃើញសញ្ញានៃការងើបឡើងវិញនៅឆ្នាំ២០២៤ ហើយយើងសង្ឃឹមថានឹងបន្តកើនឡើងកាន់តែលឿនជាងមុន។ ខ្ញុំចង់និយាយថាវិស័យធានារ៉ាប់រងបានរួមចំណែកជំរុញសេដ្ឋកិច្ចរបស់កម្ពុជា ហើយយើងរំពឹងទុកថានឹងមានកំណើនល្អនៅប៉ុន្មានឆ្នាំខាងមុខ។
សំណួរ៖ តើលោកប្រាប់យើងបានទេថា តើបេឡាជាតិរបបសន្តិសុខសង្គម (ប.ស.ស) អាចនឹងជះឥទ្ធិពលលើក្រុមហ៊ុនធានារ៉ាប់រងបានដែរឬយ៉ាងណា ខណៈដែលស្ថាប័នទាំងពីរកំពុងប្រតិបត្តិការក្នុងវិស័យការពារសុខភាព និងធានារ៉ាប់រងអាយុជីវិតដូចគ្នា?
វាមិនជះឥទ្ធិពលទេ។ ប.ស.ស គឺជាគម្រោងរបស់រដ្ឋាភិបាលដែលផ្តោតលើការគ្របដណ្តប់ជាសកលនៅកម្ពុជា។ យើងចង់ឱ្យប្រជាជនកម្ពុជាគ្រប់រូបមានអារម្មណ៍ថាមានសុវត្ថិភាពក្នុងករណីមនុស្សជាទីស្រឡាញ់ស្លាប់ ឬមានបញ្ហាសុខភាពណាមួយ ដែលរដ្ឋនឹងជួយមន្រ្តីរបស់ខ្លួន។ ដូច្នេះហើយ ពួកយើងបានកំណត់ឱ្យក្រុមហ៊ុនទាំងអស់ដែលប្រតិបត្តិការក្នុងប្រទេសកម្ពុជាត្រូវមានគម្រោង ប.ស.ស សម្រាប់បុគ្គលិករបស់ខ្លួន ដែលសព្វថ្ងៃនេះ បាននឹងកំពុងគ្របដណ្តប់រាប់លាននាក់។
នេះជាតម្រូវការមូលដ្ឋានសម្រាប់ការពារពលរដ្ឋកម្ពុជាទាំងអស់។ ប្រហែលជាមានប្រជាជនកម្ពុជាមួយចំនួនដែលចង់បានអត្ថប្រយោជន៍លើសពីការគ្របដណ្តប់ជាមូលដ្ឋានដែលផ្តល់ដោយរដ្ឋាភិបាល។ ពួកគេអាចមានអ្នកនៅក្នុងបន្ទុកច្រើន ឬតម្រូវការបន្ថែមទៀតសម្រាប់ការធានារ៉ាប់រងសុខភាពសម្រាប់ឪពុកម្តាយបងប្អូនចាស់ៗ។ ដូច្នេះអ្វីដែលក្រុមហ៊ុនធានារ៉ាប់រងផ្តល់ជូនគឺការធានារ៉ាប់រងកាន់តែទូលំទូលាយ និងស្របតាមតម្រូវការបុគ្គល និងក្រុមហ៊ុន។ ដូច្នេះ វាជាការល្អដែលតម្រូវការមូលដ្ឋានរបស់អ្នកត្រូវបានដណ្តប់ដោយ ប.ស.ស ប៉ុន្តែវាកាន់តែប្រសើរឡើងផងដែរ ប្រសិនបើមនុស្សម្នាក់អាចទិញធានារ៉ាប់រងអាយុជីវិត និងសុខភាពសមស្របណាមួយសម្រាប់គ្រួសាររបស់ពួកគេ។
សំណួរ៖ តើការធានារ៉ាប់រងយានជំនិះនឹងក្លាយជាកាតព្វកិច្ចនៅកម្ពុជានៅពេលណា?
គម្រោងសម្រាប់អោយមានធានារ៉ាប់រងយានជំនិះជាកាតព្វកិច្ចត្រូវបានលើកឡើងនៅដើមឆ្នាំ២០១៤។ យើងមានបទប្បញ្ញត្តិគ្រប់គ្រាន់សម្រាប់វា។ ឥឡូវនេះការអនុវត្តគឺជាជំហានបន្ទាប់។ ហើយយើងសង្ឃឹមថានឹងធ្វើបាននៅឆ្នាំ២០២៥។
មុននឹងយើងចាត់វិធានការពិន័យនរណាម្នាក់ ដែលមិនមានធានារ៉ាប់រង យើងត្រូវអប់រំពួកគេជាមុនសិន។ ដូច្នេះហើយ យើងកំពុងរៀបចំព្រឹត្តិការណ៍នានាដូចជា ‘ទិវាធានារ៉ាប់រងឆ្នាំ២០២៤’។ នៅពេលដែលសាធារណជនបានដឹងច្បាស់អំពីតម្រូវការក្នុងការមានធានារ៉ាប់រងលើយានយន្ត សម្រាប់អ្នកប្រើប្រាស់ផ្លូវផ្សេងទៀត និងសម្រាប់យានជំនិះរបស់ពួកគេ នោះយើងអាចបន្តទៅមុខ ហើយធ្វើឱ្យវាក្លាយទៅជាកាតព្វកិច្ច។ បច្ចុប្បន្ន យើងកំពុងពិភាក្សាជាមួយភាគីពាក់ព័ន្ធផ្សេងទៀត ដូចជាការអនុវត្តច្បាប់ អំពីរបៀបដែលយើងនឹងអនុវត្តវា ដើម្បីធ្វើឱ្យផ្លូវរបស់យើងកាន់តែមានសុវត្ថិភាពសម្រាប់ប្រជាជនកម្ពុជាទាំងអស់។
សំណួរ៖ វាជាការតម្រូវឱ្យក្រុមហ៊ុនធានារ៉ាប់រងរក្សា២០ ភាគរយនៃហានិភ័យរបស់ពួកគេជាមួយនឹងក្រុមហ៊ុនធានារ៉ាប់រងបន្តដែលគ្រប់គ្រងដោយរដ្ឋ CambodiaRe ។ តើលោកអាចប្រាប់យើងពីផែនការអនាគតសម្រាប់ទិសដៅនៃការធានារ៉ាប់រងឡើងវិញនៅក្នុងប្រទេសកម្ពុជាបានទេ? តើលោកនឹងបន្តរក្សាអត្រាហានិភ័យបន្ថែមទៀតដែរឬទេ?
នៅដំណាក់កាលដំបូងនៃឧស្សាហកម្មធានារ៉ាប់រងនៅកម្ពុជា យើងបានតម្រូវអោយអ្នកធានារ៉ាប់រងទាំងអស់ដាក់២០ ភាគរយនៃហានិភ័យរបស់ពួកគេជាមួយ CambodiaRe មុនពេលពួកគេផ្តល់ឱ្យទៅអ្នកផ្សេងទៀត។ បច្ចុប្បន្ននេះ ច្បាស់ណាស់ យើងចង់ឱ្យសមត្ថភាពរបស់ប្រទេសរីកចម្រើន និងបន្តការពារហានិភ័យបន្ថែមទៀត។ ប៉ុន្តែ យើងក៏ដឹងអំពីតថភាពនៃទីផ្សារធានារ៉ាប់រងផងដែរ។ ដូច្នេះ ក្រុមហ៊ុនធានារ៉ាប់រងរបស់យើងមិនមានកាតព្វកិច្ចដាក់ហានិភ័យជាមួយ CambodiaRe ទេ តាមពិតរចនាសម្ព័ន្ធរបស់ CambodiaRe បានផ្លាស់ប្តូរក្នុងរយៈពេលប៉ុន្មានឆ្នាំចុងក្រោយនេះ។ វាមិនមែនជាកម្មសិទ្ធិរបស់រដ្ឋ១០០ភាគរយទៀតទេ វាមានភាគហ៊ុនត្រឹមតែ៤០ ភាគរយ។ នេះត្រូវបានធ្វើឡើងក្នុងគោលបំណងកសាងជំនាញ និងសមត្ថភាពនៅក្នុងប្រទេសកម្ពុជា ដើម្បីឱ្យមានភាពប្រកួតប្រជែង និងប្រសិទ្ធភាពដូចក្រុមហ៊ុនធានារ៉ាប់រងលើសកលលោកដទៃទៀត ប៉ុន្តែក៏ផ្តល់អត្រាល្អបំផុតដល់ក្រុមហ៊ុនធានារ៉ាប់រងក្នុងស្រុករបស់យើងដែរ។
សំណួរ៖ ភ្នាក់ងារធានារ៉ាប់រងនៅក្នុងប្រទេសបានធ្លាក់ចុះពីប្រហែល ២៥.០០០ មកនៅប្រហែល ៨០០០ ទៅ ១០.០០០ភ្នាក់ងារ។ តើនេះដោយសារតែជំងឺ Covid ឬក៏មានបទប្បញ្ញត្តិកាន់តែតឹងរ៉ឹង? តើលោកអាចប្រាប់យើងអំពីផែនការរបស់ IRC សម្រាប់ភ្នាក់ងារធានារ៉ាប់រងនៅកម្ពុជាបានដែរឬទេ?
នៅ IRC យើងផ្តោតលើ “គុណភាព មិនមែនលើបរិមាណនោះទេ។” យើងចង់ធានាបាននូវស្តង់ដារវិជ្ជាជីវៈខ្ពស់បំផុតក្នុងការធានារ៉ាប់រង ពីព្រោះ វាមានផលប៉ះពាល់សម្រាប់អ្នកដែលទិញធានារ៉ាប់រងដើម្បីការពារគ្រួសាររបស់ពួកគេ។ ការលក់មិនចំគោលដៅ ឬមិនត្រឹមត្រូវគឺជាកំហុសដ៏ធ្ងន់។ ដូច្នេះនៅ IRC យើងបានចុះភ្នាក់ងារមិនល្អនៅក្នុងបញ្ជីខ្មៅ។ យើងមានយន្តការតាមដានភ្នាក់ងារយ៉ាងម៉ត់ចត់។ យើងកំពុងតាមដានក្រមសីលធម៌របស់ពួកគេ ដោយព្យាយាមធានាថាអតិថិជនដឹងពីអ្វីដែលពួកគេកំពុងទិញ និងមិនចេះតែជឿលើភ្នាក់ងារធានារ៉ាប់រងដោយងងឹតងងុលនោះទេ។ ដូច្នេះដើម្បីលើកកម្ពស់ “គុណភាព” យើងបានបង្កើនលក្ខណៈវិនិច្ឆ័យគុណវុឌ្ឍិ និងធ្វើឱ្យការពិនិត្យរបស់យើងសម្រាប់ការចេញអាជ្ញាប័ណ្ណកាន់តែតឹងរ៉ឹង។ យើងយល់ថា វានឹងមានអត្ថប្រយោជន៍រយៈពេលវែងសម្រាប់ឧស្សាហកម្មធានារ៉ាប់រង។
សំណួរ៖ ធនាគារគឺជាដៃគូដ៏សំខាន់សម្រាប់ក្រុមហ៊ុនធានារ៉ាប់រងដែលបានរួមចំណែកលក់ច្រើនជាង៧០ ភាគរយ។ តើលោកនិយាយអំពីផលប៉ះពាល់នៃវិបត្តិលើឧស្សាហកម្មធនាគារ និងរបៀបដែលវាជះឥទ្ធិពលខ្លាំងទៅលើការលក់ធានារ៉ាប់រង បានដែរឬទេ?
ខ្ញុំនឹងមិនហៅវាថាជា “វិបត្តិ” នៅក្នុងឧស្សាហកម្មធនាគារនោះទេ។ ទាំងនេះគឺជាពាក្យរបស់អ្នក។ ទោះបីជាឧស្សាហកម្មធនាគារកំពុងប្រឈមនឹងបញ្ហាមួយចំនួន ដោយសារតែអចលនទ្រព្យ និងការធ្លាក់ចុះនៃសេដ្ឋកិច្ចក្រោយជំងឺ Covid ជម្លោះរុស្ស៊ី និងអ៊ុយក្រែន តម្លៃប្រេងឥន្ធនៈខ្ពស់ និងអតិផរណា។ ប៉ុន្តែនេះមិនប៉ះពាល់ខ្លាំងដល់ការលក់ធានារ៉ាប់រងទេ។ ធនាគារបន្តជាដៃគូដ៏សំខាន់សម្រាប់អ្នកធានារ៉ាប់រង ហើយយើងកំពុងធ្វើការរួមគ្នាជាមួយពួកគេ។
សំណួរ៖ តើលោកអាចប្រាប់យើងអំពីគោលការណ៍ដាក់ចេញការធានារ៉ាប់រងប្រាក់បញ្ញើដើម្បីការពារប្រាក់បញ្ញើរបស់ប្រជាជនកម្ពុជាបានទេ?
យើងមិនពាក់ព័ន្ធដោយផ្ទាល់ជាមួយកិច្ចពិភាក្សាទាំងនេះទេ ដោយសារពួកគេស្ថិតនៅក្រោមការត្រួតពិនិត្យរបស់អាជ្ញាធរហិរញ្ញវត្ថុមិនមែនធនាគារ និងធនាគារកណ្តាល។ ប៉ុន្តែយើងអាចប្រាប់អ្នកថា កិច្ចពិភាក្សាបាននិងកំពុងដំណើរការទៅមុខ ហើយកម្ពុជាអាចសង្ឃឹមថានឹងឃើញការធានារ៉ាប់រងលើប្រាក់បញ្ញើឆាប់ៗនេះ។
Post a Comment